Páxina sobre o deseño inicial dunha iniciativa impulsada por un alumno do curso de Certificado de Deseño en Permacultura realizado en Tanquián-Galiza (2007), impartido polo Nodo Espiral (Academia de PermaCultura).
Visita a web da Rede de Troco da Coruña para ver como se foi desenvolvendo, o seu funcionamento actual e a forma de contacto.
A tempada 2007/08 estiven impulsando unha rede de troco local a pequena escala.
A idea xurde e está inspirada polo visto no módulo 5 do curso de Permacultura, concretamente pola proposta-modelo da Red de Trueque de La Palma, un dos modelos que a priori me pareceu máis completo e con máis posibilidades. Isto complementouse cun labor de documentación, principalmente a través dos materiais recopilados en http://monedascomplementarias.pbworks.com/.
CREANDO UNHA REDE DE TROCO NA CORUÑA
Obxectivos finais:
fomentar unha economía alternativa, baseada nas necesidades das persoas, non do mercado
crear unha pequena comunidade/grupo de apoio e recuperar as vantaxes de pertencer a ela
relativizar/disminuír a importancia dos cartos nas nosas vidas
revalorizarnos, comprobar na práctica que somos capaces de facer moitas cousas por nós mesmxs (habilidades, capacidades, coñecementos, coidados, apoio emocional...)
Estratexia:
crear unha rede de troco multirrecíproco-multilateral de bens e servizos, de ámbito local e a pequena escala
Táctica:
Como primeiro paso, convocouse a "I Xornada de Troco Multilateral" o día 10 nov´07 no local da Agrupación Cultural Alexandre Bóveda, asociación coñecida e con certo prestixio (fundada en 1976), cun local céntrico, cómodo e "non excluínte".
Nela explicáronse e puxéronse en práctica diversas ferramentas como: troco de bens e servizos (recíproco), bancos de tempo, moedas complementarias locais/rexionais e redes de troco multilateral/multirrecíproco.
Á xornada acudiron 18 persoas, 15 delas residentes habituais na Coruña, e 3 en Lugo e Compostela, estas últimas vinculadas a experiencias-proxectos dun incipiente banco de tempo e de mercadiños de troco na rúa, respectivamente.
PROGRAMA
Recepción
En pequenos grupos, falar das impresións coas que se chega á xornada (por que estou aquí, que espero atopar...) --> rompexelos inicial, primeiros contactos...
Mercadiño de troco convencional (troco recíproco de bens)
Mercadiño de troco de servizos-coñecementos (troco recíproco de servizos)
Reflexión sobre as limitacións dos sistemas anteriores
Explicacións e exemplos: bancos de tempo e moedas complementarias locais e rexionais
Intermedio (saír á rúa, fumar, desconectar, socializar, pensar na lista de "pidos e ofrezos")
Explicación e simulacro de rede de troco (listado de peticións e ofrecementos de bens e servizos, valorar os ofrecementos en relación á moeda propia, contabilidades individual e grupal, compartir impresións)
Lanzar pregunta-proposta: hai vontade e compromiso para crear unha rede de troco a pequena escala?
Recoller contactos das persoas interesadas
Avaliación
Remate da parte expositiva
Comida-tentempé compartido
Recollida-Fin
Tras unha xuntanza o 3 dec´07, á que acudiron 4 persoas que non foran á xornada previa, a Rede comezou a funcionar. Así, creouse unha táboa cunha ferramenta-web para, provisionalmente, servir para a comunicación entre os membros. Enlace á táboa.
CARACTERÍSTICAS e FUNCIONAMENTO da Rede de Troco
(proposta 3-12-07)
Independente e autónoma: sen vinculación a institución nin entidade algunha.
Autoxestionada: con total capacidade para decidir sobre o seu funcionamento.
Confianza mutua como base para fomentar os trocos.
A Rede actúa de intermediaria entre os seus membros. Os trocos realízanse baixo a responsabilidade dos seus integrantes.
A Rede está aberta a novos membros, co requisito de asistir a algunha das xuntanzas abertas convocadas periodicamente.
Ao comezo, a Rede (nós) outorga (outorgámonos) a cada membro (a nós mesmxs) un saldo de __ unidades.
Cada membro adquire os seguintes compromisos ante os demais membros da Rede:
comunicar os intercambios efectuados
levar a contabilidade do seu saldo persoal
non exceder as __ unidades de saldo persoal, tanto positivo como negativo
en caso de desvincularse da Rede, deixar un saldo persoal igual ou superior ao outorgado ao comezo (para evitar sensacións de “aproveitamento interesado”)
O tempo empregado nas tarefas necesarias para o funcionamento da Rede “revertirase” como saldo positivo para as persoas que as leven a cabo. Exemplos: conta de correo-e, organizar unha xuntanza periódica, etc.
Autorresponsabilidade individual e grupal respecto á observación das normas de funcionamento consensuadas.